حقيقة زواج فتاتين من بعضهما في المنصورة

– دي قصة مفبركة، والحسابات اللي عملتها مفبركة.✅✅
– الصور المنشورة على الحساب اللي باسم “reem mohsen” تخص ميكب آرتست اسمها “أمنية شوقي”، وأمنية ظهرت في فيديو نفت فيه القصة كلها، وأكدت إنها هتقاضي المواقع اللي نشرت الأخبار دي، وكل الناس اللي شاركت في الإساءة لسمعتها.✅✅
– الصور المنشورة على الحساب اللي باسم “sheryin mekawyy” دي تخص بنت اسمها شيرين مكاوي، وشيرين ظهرت في أكتر من فيديو بتنفي فيه القصة وبتقول إن كلها مفبركة، وإن هي معندهاش غير أكونت على إنستجرام فقط ومعندهاش أكونتات على فيسبوك، ومش من المنصورة أصلًا، وأكدت إنها هتقاضي المواقع اللي نشرت الأخبار دي.✅✅
– دليل آخر على إن الحسابات دي مفبركة بسذاجة هي إنهم كاتبين في المعلومات إنهم درسوا في مدرسة الملك الكامل في المنصورة، ومدرسة الكامل مدرسة للبنين فقط، مش بنات.✅✅
– مصادر أمنية قالت في تصريحات صحفية لعدد من المواقع إن القصة دي كلها مفبركة، وأن أجهزة الأمن بتحاول توصل حاليًا لأصحاب الحسابات المفبركة دي.
– مصدر أمني في الدقهلية قال لموقع المصري اليوم إن “تبين من الفحص أن حساب ريم محسن تم إغلاقه ولم يتم التوصل إليه، و بفحص حساب شيرين مكاوي تبين أنه من الباجور بمحافظة المنوفية، وأن صاحبة أو صاحب الحساب قام بإزالة جميع المنشورات الخاصة بواقعة الزواج المثلي وكذلك جميع الصور الموجودة، ولكن بفحصه والرقم الخاص به تبين أنه من الباجور”، ونفى المصدر أن تكون صاحبة الحساب من المنصورة، قائلًا: “هن من المنوفية وليس المنصورة، كما أنه مكتوب أن أحدهما من المنصورة والثانية من آجا، في حين أنه مكتوب أنهن درسن بمدرسة الملك الكامل الثانوية وهي مدرسة بنين وليس بنات”.
#متصدقش