بيض بلاستيك من الصين في الأسواق

زائف

جالنا أسئلة كتير جدًا عن موضوع “البيض البلاستيك” وناس كتير عاوزة تعرف حقيقية القصة ولا إيه الموضوع؟!👇👇

– مبدئيًا، مفيش حاجة اسمها بيض بلاستيك ، ومصر مش بتستورد بيض أصلًا، لأن عندنا اكتفاء ذاتي، وإنتاجنا بين 11 و12 مليار بيضة، وده بيكفي ويزيد كمان.✅✅

*إيه أصل الموضوع؟

– شائعة البيض البلاستيك الصيني بدأت من أكتر من سنة. كان وقتها منتشر بشكل كبير جدًا فيديو لأشخاص ماسكين كرات تشبه البيض وبيحطوا فيها مادة سائلة. وكانت التعليقات على الفيديو بتقول “الصينيين يصنعون بيضًا بلاستيكيًا من أجل الاستهلاك البشري” وبتحذر مستخدمي الإنترنت من هذا الخطر.

– اتضح بعد كده إن البيض اللي ظاهر في الفيديو ده يبقى لعبة اسمها slime، وهي عجينة هلامية أصبحت موضة عند الأطفال بيلعبوا بها ويصنعوا منها أشكال بنفسهم، واللعبة دي اللعبة باللونين الأبيض والأصفر زي البيضة وبتتغلف في قوقعة بلاستيكية شفافة زي البيضة.

– والفيديو ده كان الغرض منه إظهار عملية الصنع مش أكتر، بس الناس فهمت الموضوع غلط، وفضلت شائعة البيض الصيني منتشرة.

*إيه حكاية فيديو البيض البلاستيك المصري؟

– في فيديو تاني بتظهر فيه سيدة، باين من صوتها إنها مصرية، وهي ماسكة بيض شكله غريب بعد قليه وبيشد جامد زي البلاستيك.

– اللي خلى البيض في الفيديو يظهر بالشكل ده، هو إن البيض ده غالبًا فاسد بسبب ارتفاع درجات حرارة الجو أو تشكل غشائي غير صحيح، فلما تم قلية ظهر كإن عليه غشاء بلاستيكي.

*فيديوهات مشابهة في الهند والإمارات:

-كان في فيديو مشابه للفيديو بتاعنا ده انتشر في الهند في أبريل 2017، وخبراء هنود بينهم عميد جامعة كارناتاكا للطب البيطري والعلوم الحيوانية والسمكية، عملوا تجارب ع الهوا على البيض اللي بيتقال عليه بلاستيك ده، واتضح إن كل ما في الموضوع إن ده بيض فاسد.

-براكاش رامادوس، مسؤول الجودة أحد شركات الأغذية في مدينة مومباي بالهند، كتب تدوينة على “لينكد ان” بيشرح فيها ليه البيض ممكن يبان كأنه بلاستيك. الراجل بيقول إن البيض بيغير نسيجه مع تغير درجات الحرارة، في الوقت اللى الحرارة بتكون في المزرعة 40 درجة بتنخفض فجأة في المتاجر لـ 20.
– حسب كلامه ده بيعمل صدمة حرارية بتعمل أحيانا تصلب في أغشية القشرة الداخلية والخارجية للبيض يخليه يظهر كأنه بيض بلاستيكي، خاصة لما يتجاوز تاريخ إنتاجه 15 يوم. واتكلم كمان عن إن نقص الكالسيوم في علف الفراخ ممكن يأثر على قوام البيض.

– كمان فيه باحث بجامعة تركية، اتكلم في بحث ليه عن تأثير درجة الحرارة على مدى صلاحية البيض، وبيقول إن تغير الحرارة خلال وقت التخزين بيأثر على وزن البيض نفسه وزيادة الزلال السائل فيه ودرجة حموضته.

– كمان كان فيه فيديو شبيه انتشر في الإمارات قبل مصر، وإدارة سلامة الغذاء ببلدية دبي، أصدرت توضيح في أبريل اللي فات بخصوصه، وقالت إن “مادة البلاستيك بتكون صلبة على درجة حرارة الغرفة وبتدوب لما بتتسخن عند حرارة 80 درجة مئوية. وبما إن البيض ده كان سائل قبل ميتحط على النار وبقى جامد بعد متحط عليها، فده مش بلاستيك أكيد”.

*هل في رد رسمي على الموضوع؟
مفيش أي رد من وزارة التموين، ولا مباحث التموين لحد دلوقتي، لكن عبدالعزيز السيد، رئيس شعبة الدواجن بغرفة القاهرة التجارية، علق على موضوع البيض الصيني البلاستيك وقال إن مصر أصلًا مش بتستورد بيض عشان هي بتنتج من 11 لـ12 مليار بيضة سنويًا والإنتاج المحلي مكفي الاستهلاك.

السيد تساءل “هل يعقل تصنيع البيض من البلاستيك الذي يفوق سعر الطن منه 27 ألف جنيه، ليبيع البيضة بجنيه؟”. وده يبدو كلام منطقي.

رئيس شعبة الدواجن كمان طلب إن أي مواطن يكتشف المنتجات دي في السوق إنه يقدم شكوى أو بلاغ يتضمن عينات من البيض الصيني، إلى الغرفة أو لجهاز حماية المستهلك أو لمعامل وزراتي الصحة والزراعة حتى يتم التحقيق فيها.

أقرأ المزيد عن

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى