حقيقة معجزة القبة الطائرة في النيبال

واحد من قراء الصفحة بعت لنا فيديو منشور على فيسبوك، وطلب منا نتحقق منه، خاصة إن الفيديو منتشر بشكل كبير وعامل حتى الآن 7 مليون مشاهدة وربع مليون شير!

– الفيديو منشور من 3 سنين في حساب شخص من العراق بيقول إن مسلم في نيبال بنى مسجد وشركة البناء رفضت رفع قبة للمأذنة المُلحقة بيه، وقالت له “اطلب من ربك ونبيك أن يرفعوه فغضب الرجل ونام حزين ومقهور ثم رأى الرسول صلى الله عليه وآله وسلم في المنام وطلب منه أن يغطي الهيكل ففعل وبعد صلاة الضهر ارتفع الهيكل لوحده إلى أعلى المنارة”.❌❌

زائف

– مفيش معجزة طيران قبة مسجد ولاحاجة، القبة بتتحرك على “كابل واير”، والفيديو من أندونيسيا مش نيبال. ✅✅

– الفيديو متصور سنة 2003، عشان كده جودتة سيئة جدًا، وحسب كلام الإندونسيين فالوسيلة اللي تم بيها شد القبة شبيهة بواير كهربي زي المستخدم في تحريك التليفريك.

– البعض هيقول إن القبة ثقيلة وإن الواير مش باين كفاية في الفيديو، لكن دي الطريقة اللي كانت بيرفع بيها الناس قباب المساجد، خاصة في وقت مكنش فيه آلات رفع متقدمة.

– لقينا فيديو متصور من زاوية تانية، بيوضح إن في ناس واقفة فوق المأذنة وبتقوم بحركات بدنية كنوع من المساعدة في جذب القبة ناحية المأذنة، وظاهر فيه امتداد لحبال مربوطة بهيكل المأذنة من الجانب التاني.

– لو دققنا في الفيديو المنتشر هنلاحظ إن فيه خط واصل ما بين نقطتين، هم المسجد القديم ومنارة المسجد الجديد، ولو عملنا صورة بانورامية مجمعة لمشاهد الفيديو هنلاحظ إن القبة بتتحرك في مسار ثابت بين نقطتين، يعني لو كانت طايرة كانت على الأقل تحركت للأعلى والأسفل بشكل عشوائي.

– في بداية الفيديو كانت القبة ظاهرة مايلة بزاوية تقدر بـ 25 درجة، وده يبين إنها كانت متعلقة بحاجة لأنها لو طايرة لوحدها هتكون في وضع مستوي تمامًا، كمان هتلاحظ قبل تحرك القبة خطوط أشبه بحبال مشدودة.

#متصدقش

المصدر
- الفيديو المتداول:
أقرأ المزيد عن

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى