حقيقة وضع علامة شيفرولية على السيارات الصيني

– صورة منتشرة بشكل كبير فيها عربيتين قريبين من بعض في الشبه جدًا، واحدة منهم عليها علامة Baojun والتانية علامة شيفرولية، مع تعليق: “هي دي العربية الصيني اللي منصور شيفرولية بيغير العلامة بتاعتها بعلامة شيفرولية ويكسب فيها ملايين. العربية دي سعرها 2000 دولار يعني 40 ألف مصري، منصور بيبعها 280 ألف جنيه يعني مكسب 200 ألف جنيه.. اسبارك دي عربية صيني وبتنزل مصر يتغير ورقها والعلامة التجارية شيفرولية.. الكلام ده حقيقي”.

زائف

– الكلام ده غير صحيح. البوست مليان مغالطات. ✅✅⬇️⬇️

– العربية الأولى (البني) اسمها Baojun 630. بدأ طرحها عام 2011 في الصين بشكل أساسي، وهي أول طراز من علامة Baojun الجديدة لسيارات الركاب، وتم إنتاجها عن طريق شركة SGMW لصناعة السيارات، اللي هي مشروع مشترك بين General Motors وSAIC وWuling Motors، وSGMW مقرها ومصنعها في الصين. وسعر السيارة دي بيتراوح بين 9 و11 ألف دولار، مش زي ما مكتوب في البوست إنها بـ2000 دولار.

– العربية التانية (الحمرا) دي تبقى Chevrolet Optra الجديدة. بدأ طرحها في مصر وشمال أفريقيا عام 2014، عن طريق شركة General Motors، اللي بتمتلك علامات سيارات Baojun وChevrolet وعلامات تانية زي Buick و Cadillac و Jiefang و Opel و Wuling.

– سيارة Chevrolet Optra تقريبًا هي نفس سيارة Baojun 630 مع تغيير العلامة بقرار من الشركة، وتم إنتاجها في الصين في البداية، وفي 2016 بدأ تجميعها محليًا في مصر في مصنع General Motors في 6 أكتوبر. وسعرها حاليًا بيتراوح بين 13 و14 ألف دولار.

– شركة المنصور للسيارات تبقى وكيل علامة شيفرولية وعدة علامات تانية في مصر. وكده يعني المنصور مش بيغير علامة Baojun 630 لعلامة شيفرولية زي ما مذكور في البوست، هو وظيفته بيبيع سيارات الشركة المالكة للعلامة واللي هي General Motors.

– في بوستات من 2015 عن موضوع إن Chevrolet Optra طلعت صيني وإن شركة المنصور كانت بتقول للعملاء إنها كوري، وفي مواقع صحفية كتبت عن الموضوع. ووقتها جريدة الدستور نقلت تصريحات عن نور الدين درويش، نائب رئيس الشعبة العامة للسيارات، إنه قال “استبدال شركة شيفروليه لعلامة السيارة الأصلية ليس به خطأ، وأن السيارات لا تعاب على محل صنعها كما هو الحال مع الشركات الكبيرة مثل مرسيدس وبي إم دبليو، لافتاً إلى أن تصينع هذه السيارات بمصر لا ينتقص منها شيئاً وإنما تظل قوة العربية مستمدة من علامتها وشركتها”.

المصدر
البوست المنتشر:
أقرأ المزيد عن

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى