دراسة بريطانية: لحم الخنزير والخمور يسببان السرطان

– خبر منتشر على الفيس بوك وفي بعض المواقع الصحفية نقلاً عن جريدة “ديلي تليجراف” البريطانية، بيقول إن “لحم الخنزير والخمور بتسبب السرطان”.

زائف

– الكلام ده مقتطع من سياقة، ومش متقال كامل.

– الموضوع بيتكلم عن دراسة من منظمة خيرية بريطانية غير حكومية اسمها الصندوق الدولي لمكافحة السرطان، والدراسة اتعرضت في المؤتمر الأوروبي لمكافحة السمنة في فيينا، بتتكلم بشكل عام عن مخاطر الحياه غير الصحية، وإن زيادة الوزن تؤدي إلى 12 نوع من السرطان.✅✅

– مفيش أي كلام في الدراسة خالص عن لحوم الخنزير بعينها، لكن التحذير من كل اللحوم المصنعة بكل أشكالها زي كل المعلبات والسوسيس والبيكون..الخ، بيشددوا على عدم تناولها خالص، والنقطة دي تعرضت لترجمات غير دقيقة زي ترجمة الدستور ان لحوم الخنزير تسبب سرطان أمعاء ده مش موجود في النص اللي كان بيتكلم عن كل اللحوم المصنعة.

– الدراسة بتحذر بشدة من كل أنواع المشروبات اللي تحتوي على سكر (زي كل المياه الغازية) والكحول اللي ربطوها ب 6 أنواع من السرطان، وأحد الخبراء اللي عملوا الدراسة بينصح بالاكتفاء بشرب المياه فقط لا غير.

– كمان الدراسة تدعو لتقليل كميات اللحوم الحمراء كلها (يعني لحوم المواشي والغنم والخنزير)، وتناول غذاء صحي فيه خضروات وفواكه، وممارسة الرياضة.

– بشكل عام محتاجين ندقق أكتر في الأخبار المنسوبة لـ”دراسة علمية”، لأن وجود دراسة بتتكلم عن (العلاقة) بين كذا وكذا مش بيكون حاسم بشكل نهائي، بل ساعات الدراسات دي تطلع نتايج عكس بعض، وعندنا هنا مثال واضح إن الجهة دي نفسها، الصندوق الدولي لمكافحة السرطان، أصدرت دراسة تانية في 2010 بتقول إن شرب النبيذ منخفض نسبة الكحول بيحمي من السرطان!

– بشكل عام في أي دراسة بتقيس (العلاقة) بتكون الطريقة انه يتابع عينة ويربط بين العاملين، وبتزيد المصداقية بزيادة حجم العينة والثقة بالجهة وتكرار نفس النتايج بدراسات تانية وعوامل أخرى، والدراسات دي مؤشر مهم يتاخد بجدية طبعاً، لكن الاثبات النهائي لإن كذا هو (السبب) وتدقيق تفاصيله، بيحتاج مراحل كتير لحد ما تصدر توصية محددة من جهات رسمية زي منظمة الصحة العالمية او هيئة الغذاء والدواء الامريكية.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى