إزاي أوصل للمعلومات غير المرئية لحساب على فيس بوك؟

– خلال شغلنا على التحقق من مدى مصداقية الأشخاص اللي بينشروا بوستات على فيس بوك، بنكون مهتمين نعرف أكتر عنه، مش بغرض مراقبته أو اختراق خصوصيته، لكن بالأساس بنكون مُهتمين نتأكد من خلفياته عشان نقدر نفهم سياق البوستات اللى بينشرها وبالتالي نتأكد إنه نقول جايز يقول كلام صحيح فعلا ولا لاء.

– من بين الأدوات اللى بنستخدمها لمعرفة المزيد عن حساب معين على فيس بوك، أداة اسمها StalkScan، اللي بتظهر جميع المعلومات العامة عن شخص معين على فيس بوك، اللي بتكون متاحة بالفعل لكن مش بنعرف نشوفها بسهولة.

– بمجرد ما تحط رابط حساب معين في الخانة المخصصة لده على الأداة، بتتقسم النتائج لأقسام ما بين البوستات اللى الحساب عمل لها لايك أو علق عليها، والجروبات والصفحات اللى يتابعها، واصدقائه وزملاء العمل، والأماكن اللى زارها قبل كده.. تفاصيل إضافية مختلفة.

* الأداة بتظهر بس الحاجات اللى صاحب الحساب عملها “Public” أما إذا كانت مخصصة للأصدقاء فقط أو البوستات اللي عملها لنفسه، فهيا مش هتظهر في نتائج البحث.

* ننصح الناس اللى مهتمة تستخدم الأداة إنهم مش يستخدموها لأغراض غير أخلاقية في التلصص على الناس واهتماماتهم.. الأداة اتعملت للمساعدة وليس مطاردة الآخرين.. ويمكن دي فرصة برضو لكل شخص إنه يختبر من خلال الأداة مدى إجراءات الخصوصية اللى عاملها لحسابه، ويراجعها ويعدلها، بحيث يحافظ عليها بعيدا عن تلصص الآخرين.