حقيقة الزواج من أوزباكستانية مقابل 150 دولار

بوست منتشر بشكل كبير جدًا، وكذا حد من متابعينا بعت يسأل عنه، بيتكلم عن الزواج في أوزباكستان وبيقول: “جمهورية أوزبكستان،اسم العملة: سوم. مدة الطيران : 3 ساعة. يعني بعد 3 ساعات من الطيران أنت بتكون عندهم. – الأجواء: قريبه من طقس تركيا -وضع البلاد العام: آمن جدا. – الزواج: مهر البكر : ١٠،٠٠٠ سوم (تعادل 150 دولار) يعنى ٢٧٠٠ جنيه مصري او اقل. مهر السيدة : ٥،٠٠٠ سوم (تعادل 75 دولار).. يعنى ١٣٥٠ جنيه مصري او اقل. يعني نفس السعر اللى بتدفعوا لكوافير العروس عشان تعمل رأسها زي سرج الفرس .. ممكن السعر يجيب أربعة بنات اقل واجب…!! أؤكد ان مدة الطيران اليها 3 ساعة .. وربنا يقدرنا على فعل الخير”.

زائف

الكلام ده غير صحيح لعدة أسباب:⬇️⬇️

أولًا: مفيش طيران مباشر من مصر إلى أوزباكستان. ورحلة الطيران من القاهرة إلى طشقند عاصمة أوزباكستان، لو هتنزل ترانزيت في إسطنبول، بتاخد حوالي 7 ساعات بدون احتساب وقت التوقف.✅✅

ثانيًا: 150 دولار = 1.36 مليون سوم أوزباكستاني، مش 10 آلاف سوم زي ماهو مكتوب.✅✅

ثالثًا: الزواج في أوزباكستان مكلف جدًا، ودي كانت قضية بتشغل الرأي العام هناك بشكل كبير جدًا، لدرجة إن رئيس الجمهورية طالب بتقليل مظاهر البذخ اللي بتتعمل في حفل الزفاف، ودعى لسن تشريعات خاصة بالموضوع ده.✅✅

– حفل الزفاف في أوزباكستان له تقاليد مكلفة جدًا، ومتوسط تكلفة الحفل حوالي 20 ألف دولار، لأنه بيشمل فطور صباحي بيتكون الأرز واللحم لحوالي 400 إلى 500 فرد، واستئجار 10 عربيات ليموزين بتكلفة 200 دولار للعربية الواحدة، وحفل زفاف مسائي في قاعة يعزم فيها حوالي 400 فرد، وبيكون في فرق موسيقية.

– تكاليف الزواج بتبدأ من الخطوبة اللي أهل العريس بيقدموا فيها للعروسة وأهلها هدايا وملابس وأطعمة، وقبل حفل الزفاف بيتم نفس الأمر. والتكاليف تشمل شراء أثاث، وعشرات الأزياء للعروسة والعريس، وأجهزة منزلية جديدة. وبتستمر كمان لبعد الجواز، إذ يتعين على العريس والعروسة دعوة أقاربهم الجدد وتقديم هدايا لهم.

رابعًا: مفيش حاجة اسمها إنك “تجيب/ تجوز أربعة بنات هناك أقل واجب”. تعدد الزوجات في أوزباكستان ممنوع قانونيًا.

المصدر
البوست المنتشر:البوست المنتشر:
أقرأ المزيد عن

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى