حقيقة طلب مسيسي إلغاء مباراة الأرجنتين وإسرائيل

– الماتش اتلغي بعد الضغوط السياسة العالمية والفلسطينية لعدم لعب الماتش في إسرائيل✅✅.

– النشطاء الفلسطينيين وحملات مقاطعة دولة الاحتلال صعّدوا من لهجتهم ضد منتخب الأرجنتين بعد أما الحكومة الإسرائيلية قررت نقل الماتش من حيفا، للقدس، واللي شاف فيه الفلسطينيين محاولة لتسييس الماتش أكتر، واستغلال وجود منتخب الأرجنتين في القدس كاعتراف بإنها عاصمة إسرائيل.

– كمان فيه مظاهرات خرجت في رام الله تطالب الأرجنتين إلغاء الماتش، ورئيس اتحاد الكرة الفلسطيني دعا لحرق صورة ميسي لو لعب الماتش.

– كمان حصلت مظاهرات في مدينة برشلونة الإسبانية قدام مقر معسكر المنتخب الأرجنتيني تدعوهم لعدم لعب الماتش.

– في حواره مع شبكة “ESPN” مهاجم الأرجنتين هيجواين، مربطش بين ميسي وإلغاء الماتش أبدًا زي ما التصريح المتداول بيقول، لكن قال إن ده هو القرار الصح، لأن “الأمان والمنطق بييجو قبل كل حاجة تانية” وده كان بعد الطلبات المتكررة من اتحاد الكرة الفلسطيني وكتير من المؤسسات الداعمة للقضية الفلسطينية.

– فيه تصريح ممكن نعتبره داعم للقضية الفلسطينية، قاله هوغو مويانو، نائب رئيس اتحاد الكرة في الأرجنتين، قال فيه إن الماتش مش مستاهل وإن التهديدات اللي اتعرضلها اللاعبين أثرت عليهم وعلى أسرهم، وقال “ده القرار الصح، بسبب اللي بيحصل هناك، وإنهم بيقتلوا ناس كتير. إنت كإنسان مش ممكن تقبل ده بأي شكل”

– إلغاء الماتش كان مستفز فعلا للإسرائيليين، اللي حاولوا يقنعوا الأرجنتين بالتراجع عن القرار، لدرجة إن نتنياهو كلم رئيس الأرجنتين عشان يقنع المنتخب، لكنه رفض في الآخر.