حقيقة الإفراج عن صبري نخنوخ

أسئلة كتير من متابعين عاوزين يعرفوا حقيقة الإفراج عن صبري نخنوخ؟ وإيه سبب الإفراج عنه بعفو رئاسي دلوقتي؟. هنا هنقدم معلومات قدر عن صبري نخنوخ وموقفه القانوني من وقت القبض عليه حتى العفو الرئاسي عنه:👇👇👇

** مين هو نخنوخ؟
– اسمه “صبري حلمي حنا نخنوخ”. تم القبض عليه عام 2012 بتهم حيازة أسلحة غير مرخصة ومواد مخدرة وحيوانات مفترسة بفيلته في الإسكندرية.

– بعد القبض عليه ظهرت تقارير صحفية كتير بتتكلم عن علاقات نخنوخ بنظام حسني مبارك ومسؤوليته عن أعداد كبيرة من البلطجية اللي كان نظام مبارك بيستعين بها في الانتخابات، واستخدام علاقاته ونفوذه لإرهاب الناس وتخويفهم والحصول على مصالح.

** إيه الأحكام اللي صدرت ضد نخنوخ؟
– اتحكم على نخنوخ في 2013 بالسجن المؤبد، وتم تأييد الحكم في 2014 مرة تانية من محكمة النقض، وبكده أصبح الحكم نهائي وغير قابل للطعن.
– بعد 5 أيام من الحكم على نخنوخ بالسجن المؤبد، المحكمة الدستورية العليا أصدرت حكم بعدم دستورية القانون اللي تم الحكم على نخنوخ بناء عليه (قانون 6 لسنة 2012)، وده فتح باب لنخنوخ للطعن حكم النقض أمام المحكمة الدستورية.
– في 2016 المحكمة الدستورية العليا قبلت دعوى نخنوخ، وحكمت بإلغاء الحكم الصادر ضده، وبناء عليه ملف نخنوخ رجع مرة تانية للنائب العام عشان تتم إعادة إجراءات مقاضاته مرة تانية.

***هل نخنوخ خرج من السجن بعفو صحي؟
-نخنوخ مخرجش بعفو صحي، ده خرج بعفو رئاسي من الرئيس عبد الفتاح السيسي. والعفو الرئاسي ده بيترتب عليه إنهاء جميع الإجراءات القضائية اللي بدأت لإعادة محاكمة نخنوخ، وكمان بينهي جميع الإجراءات اللي نخنوخ أخدها لإلغاء آثار حكم الإدانة الصادر ضده.
– الدستور بيدي لرئيس الجمهورية سلطة العفو الخاص عن العقوبة، أو تخفيفها. والرئيس بيستخدم السلطة دي من وقت للتاني (خاصة في المناسبات الدينية والقومية) في العفو عن بعض المسجونين سواء السياسيين أو الجنائيين.

** ليه خرجوا نخنوخ من السجن؟
– إلى الآن مخرجش أي تفسير أو تبرير رسمي من المسؤولين في الدولة عن سبب العفو عن صبري نخنوخ. وكل الاشاعات اللي بتقول إنه خرج لأسباب صحية أو لإنه قضى نص المدة مفيش أي أصل ممكن نستند عليه. خصوصا إن الصور المتداولة له بعد خروجه مفيهاش حاجة توضح سوء حالته الصحية.
– دي كمان مش أول مرة يتم فيها العفو عن متهمين جنائيين معروفين. عندنا مثلًا في 2016 صدر عفو رئاسي شمل اللواء محسن شتا المدير التنفيذي للنادي المصري المحكوم عليه بالسجن 5 سنوات في قضية “مذبحة بور سعيد”، وفي 2017 صدر عفو رئاسي عن هشام طلعت مصطفى (اتقال وقتها إنه لأسباب صحية).