زائف


– الفيديو مقتطع من سياقه. الرئيس كان بيحكي تجربة دولة تانية مش عن مصر.✅✅ – الفيديو من أكتوبر 2016، في جلسة “التعليم المدمج رؤية جديدة للتعليم المصري”، ومدته الأصلية حوالي 14 دقيقة، وكان السيسي بيعلق فيه على اقتراحات تطوير التعليم، وحكى كذا تجربة لدول تانية في النهوض بالتعليم مينفعش تطبق في مصر لإن مصر مختلفة …


حقيقة كلام السيسي عن تعليم طبقة وترك باقي الشعب

Oct. 02, 2018 - سياسي
حقيقة كلام السيسي عن تعليم طبقة وترك باقي الشعب
حقيقة-كلام-السيسي-عن-تعليم-طبقة-وترك-با
الإدعاء

- فيديو متداول بشكل كبير للرئيس عبد الفتاح السيسي وهو بيتكلم عن التعليم وبيقول: "هعمل طبقة متعلمة تعليم راقي جدًا وباقي المجتمع مش مهم، والطبقة دي هي اللي تقود المجتمع وتاخده لقدام والباقي خلاص، هي لما هتقود هتقدر تعمل نهضة والنهضة تجيب قدرة أقدر أوظفها بعد كده لباقي الناس"، ومع الفيديو ده تعليق: "اهو انا عرفت دالوقتى ليه المهازل اللى بنشوفها فى المدارس حاليا #سيسي_مدمر_التعليم".

نتيجة التحري

– الفيديو مقتطع من سياقه. الرئيس كان بيحكي تجربة دولة تانية مش عن مصر.✅✅

– الفيديو من أكتوبر 2016، في جلسة “التعليم المدمج رؤية جديدة للتعليم المصري”، ومدته الأصلية حوالي 14 دقيقة، وكان السيسي بيعلق فيه على اقتراحات تطوير التعليم، وحكى كذا تجربة لدول تانية في النهوض بالتعليم مينفعش تطبق في مصر لإن مصر مختلفة عن الدول دي.

– الرئيس حكى أول تجربتين لدول زارها، وقال:”دولة من اللي إنتم بتتكلموا عليها دي عدد سكانها 2 مليون ومساحة أرضها 700 كيلو متر، وكان في عنف في إن محدش يتكلم.. أقدر أعمل أنا كده؟ حد يقبل كده لمدة 20 سنة؟… آدي دولة، الدولة التانية اللي شوفتها قالت لأ أنا هعلم بس لحد الإعدادي مجاني، وخلت اللي بعد كده تكلفته على الأسرة… أقدر أنا أعمل كده؟ مدي تجربة! نقدر نعمل كده في مصر؟”.

– وبعدها حكى التجربتين دول قال نصًا: “التجربة التالتة لدولة قالت لأ أنا هعمل طبقة متعلمة تعليم راقي جدًا وباقي المجتمع مش مهم، والطبقة دي هي اللي تقود المجتمع وتاخده لقدام والباقي خلاص، هي لما هتقود هتقدر تعمل نهضة والنهضة تجيب قدرة أقدر أوظفها بعد كده لباقي الناس، أقدر أعمل كده في مصر ولا لأ؟”، وسياق الكلام كان انتقاد للتجارب دي، وإنها متنفعش في مصر.