حقيقة سرقة أب زي مدرسي لابنته في دمياط

الكلام ده مش حقيقي، الرائد محمد معوض، رئيس المباحث في قسم أول دمياط، نفى الكلام ده كله من الأساس، وقال في صفحته على فيس بوك: “أقسم بالله لا فيه حاجة اتسرقت ولا شوفت حد أصلا ولما الموضوع ده اتقال إن فيه سرقة كلمت المسؤول عن المعرض وقال لي مفيش حاجة أصلا سرقت وكل اللي سألني قولت مفيش بلاغ أصلا بكده ولم أعرف شيء عن الموضوع غير من الفيس بوك”.

– صحيفة الوطن كمان نقلت عن النائب البرلماني اللواء محمد الزيني، رئيس الغرفة التجارية في دمياط، نفيه للقصة، وقال: “فرضا لو كان هناك أب غير قادر على شراء زي لا يمكن القبض عليه نحن نظمنا المعرض لعرض مستلزمات المدارس بأسعار مخفضة للمواطنين البسطاء فلو كان ما تم ترويجه صحيح لكنا قدمنا له الزي دون مقابل مادي ودون القبض عليه الأمر مش مستاهل”.

– رغم نفي وجود حادث سرقة من أصله، إلا أن بعض الناس ومواقع إخبارية نشرت القصة، زي موقع “التحرير” اللى نقل عن مصدر في مديرية أمن دمياط كلامه إن الواقعة حصلت، وإن الأب المتهم بالسرقة قال وقتها “مش قادرين نفرّح بنتنا وهي رايحة المدرسة زي باقي بنات الناس بسبب الغلاء”، كمان موقع “مصراوي” في تقريره عن الواقعة، أشار إلى أن شهود عيان قالوا إن رجال أعمال قاموا بدفع ثمن “البدلة” اللى اشتراها الرجل لابنته، وإن اللواء محمد الزيني تدخل لإخلاء سبيله من القسم.