هل فعلًا مفيش سجون في السويد أو بطالة في ألمانيا؟

الكلام ده غير صحيح. ✅✅

– ألمانيا فيها نسبة بطالة منخفضة جدا فعلا لكن موجودة، فيها في نوفمبر الماضي النسبة كانت 4.8%.

– السويد من أقل دول العالم بعدد السجناء، وفعلا بيفخرو بتجربتهم في غلق بعض السجون بعد انخفاض عدد السجناء .. لكن يظل البلد فيها 5957 سجبن حسب ارقام 2017 (يشمل اللي على ذمة قضية والمحكوم عليهم)، وعندهم 79 مؤسسة عقابية (46 سجن و33 سجن احتياطي)، وإن كانت بتتميز بإن سجونها جيدة جدًا وبتراعي حقوق الإنسان (غرف مريحة وأكل نظيف ووسائل ترفيه وممارسة رياضة).

– أما سويسرا فهما حسب تعريفهم عندهم 615 ألف فقير بيمثلوا حوالي 7.5% من عدد السكان، بحسب آخر الإحصاءات المعلنة من قبل مكتب الإحصاء الفدرالي السويسري في أبريل الماضي. ( لكن طبعاً مهم جدا هنا نقول ان تعريف الفقر مختلف لأن الفقير في سويسرا هو اللي دخله الشهري أقل من 2247 فرانك يعني حوالي 2252 دولار، والفقير ده متغطي بمظلة صحة وتعليم مجانيين وفي منظومة لتقديم طلبات لتوفير سكن واعانة بطالة)
وفيه اعانة بطالة)
– النمسا فيها درجة تلوث الهواء منخفضة لكن موجودة وبيناقشو يخفضوها اكتر.

– واليابان وإن كان نسبة المتعلمين فيها من أعلى النسب عالميًا لكن في نسبة أمية تبلغ 1% بين من هم أكثر من 15 عامًا.

** طبعًا إحنا مش بننكر ان الدول دي حققت انجازات كبيرة جدا بالمجالات دي، ولا بنقول إنه كده زينا زيهم اهو عندهم فقر وبطالة زي ما بعض الاعلاميين والسياسيين بيضخموا أي مشكلة في الخارج بالغرض ده، إحنا بس بنوضح حقيقة معلومات مغلوطة منتشرة، وان دايما بنحتاج نعرف تفاصيل للصورة الكاملة مش جزء صغير منها سلبي أو ايجابي.