البنك المركزي المصري أعلن، أمس الثلاثاء، طرح عملة جديدة من فئة العشرة جنيه مصنوعة من البلاستيك (البوليمر الصناعي)، مؤكدًا في الوقت نفسه استمرار العمل بالعملات الورقية من فئة 10 جنيه المتداولة حاليًا.
في البوست ده هنوضح معلومات أكتر عن مادة البوليمر المصنوع منها العملة الجديدة ومميزاتها وعيوبها
– ظهرت العملات الورقية في القرن السابع الميلادي في الصين ومن بعدها انتشرت في أوروبا ومنها للعالم كله لحد ما وصلت لصورتها اللي معانا في الوقت الحالي.
– جرى تصنيع العملة الورقية من القطن، والقطن أصلًا بيتكون من السليلوز Cellulose، والسليلوز في حد ذاته مادة بوليميرية طبيعية، يعني العملة الورقية هي بوليمير برضو، لكنه طبيعي، وعشان نفهم أكتر لازم نعرف في البداية يعني إيه بوليمر.
# ما هي المركبات البوليمرية؟
– تعني كلمة بوليمر في اللغة اليونانية “أجزاء كثيرة” وتتكون المركبات البوليمرية من جزيئات صغيرة ومتطابقة من مواد كيميائية تسمى (المونومرات monomers ) وترتبط هذه المونومرات ببعضها بعضًا في سلسلة لا نهائية لتكون في النهاية البوليمر.
-والبوليمر ينقسم إلى نوعين؛ نوع طبيعي زي النشا والسليلوز (القطن) أو اللجنين (الخشب)، ونوع صناعي تدخل في تصنيعه مواد كيميائية صناعية زي البولي إثيلين والبولي بروبيلين.
– البوليمر موجود في حاجات كتير جدًا جدًا حوالينا وبنستخدمها بشكل يومي، وبيدخل في صناعات كتيرة زي الملابس ومستحضرات التجميل والصابون وتصنيع المطهرات والبلاستيك وزجاجات المنظفات المنزلية وقطع غيار السيارات وتصنيع بطاقات الائتمان، وفي صناعات أخرى كثيرة.
# لماذا لجأت الدول إلى استحداث عملات بوليميرية جديدة
– العملة الورقية بتتكون عادة من 75% قطن، لكن التركيبة دي بتتسب في سرعة تلفها، وطبعًا إعادة طباعتها بتكلف الدولة أموالًا كثيرة، ده غير إنها سبب كبير في نقل البكتيريا والجراثيم.
– عشان كده بدأ البحث عن تركيبة جديدة نصنع منها العملات وتجنبنا السلبيات دي، لحد ما توصل العلماء للتركيبة البوليميرية التي يمكن استخدامها مرتين لأربع مرات أكتر من الورق العادي.
# كيمياء العملات البوليمرية الجديدة
– تحتفظ معظم البلدان بسر المواد الكيميائية التي تستخدم في تصنيع النقود البوليمرية لتحاشي تزويرها (سر الخلطة زي ما بنقول)، وهو نفس ما قام به البنك المركزي المصري حيث لم يعلن تفاصيل المواد الكيميائية الداخلة في تصنيع العملة الجديدة.
– بشكل عام المادة الأساسية اللي بتدخل في تصنيع العملات البلاستيكية هي البولي بروبيلين Polypropylene، وهي مادة لها استخدامات على نطاق واسع زي في صناعة النسيج والملابس والسجاد والتغليف.
– في دول زي كندا بتعتمد على مادة البولي إيثيلين تيرفثالات polyethylene terephthalate في تصنيع البوليمر الخاص بيها، وهي مادة لها برضو استخدامات واسعة في مجال صناعة النسيج.
– بنك إنجلترا كان أوضح سابقًا إنه بيضيف مشتقات حيوانية أو زيت النخيل بنسب ضئيلة جدًا جدًا في خلطته، لكن برضو مانعرفش كل المواد المستخدمة إيه.
# البلاد التي تستخدم العملة البلاستيكية
– يوجد حاليًا أكتر من 30 دولة بتستخدم النقود المصنوعة من البوليمر، وتعتبر أستراليا هي أول دولة تستخدمها سنة 1988، ومن بعدها بلاد تانية اعتمدتها زي كندا ونيوزيلندا وإنجلترا وفيتنام وغيرهم.
# مميزات العملة البلاستيكية
– أهم ميزة إنها مش بتتقطع بسهولة وعمرها الافتراضي أطول لحد 4 مرات أكتر من العملات الورقية العادية لذلك .
– ولأن العملات البلاستيكية غير مسامية فهي لا تتسخ بسهولة ولا تتأثر بالرطوبة وبالتالي هي أقل من الورق في نقل البكتيريا والجراثيم.
– كمان بسبب تركبيتها الفريدة، ووجود عدة مستويات من الحماية هناك صعوبة كبيرة في تزويرها مقارنة بالعملات الورقية.
– تعتبر الأوراق النقدية المصنوعة من البوليمر أكثر صداقة للبيئة من الورق عشان ممكن ننظفها بالمياه كما يمكن إعادة تصنيعها.
# عيوب العملة البلاستيكية
-العملة البلاستيكية غير مقاومة للحرارة العالية، عشان كدا ممكن تسيح لو تعرضت للحرارة العالية أو اتكوت بالغلط مع الملابس مثلًا.
– رغم ان صعب تمزيقها لكن، لو اتقطع جزء منها لأي سبب، هتتقطع كلها بسهولة.
– الصعوبة النسبية في الطي.
– ملمسها ناعم، وده بيخليها صعبة شوية في العد اليدوي وممكن تلزق في بعضها.
العربية
ENGLISH