آخر التحقيقات
بحث

صحيح

خلال ظهورها مؤخرًا زعمت الفنانة سماح أنور عدم شربها للمياه على مدار 17 عامًا، وقالت إنها بتشرب سوايل لكن مبتشربش مياه نهائي.


#اعرف.. يعني إيه سماح أنور مشربتش مياه من 17 سنة؟

Sep. 27, 2022 - اجتماعي
#اعرف.. يعني إيه سماح أنور مشربتش مياه من 17 سنة؟
الإدعاء

خلال ظهورها مؤخرًا زعمت الفنانة سماح أنور عدم شربها للمياه على مدار 17 عامًا، وقالت إنها بتشرب سوايل لكن مبتشربش مياه نهائي.

سماح ادعت إن شرب المياه الكتير مجرد بيزنس وإنه "بيجيب بلاوي في القلب" على حد وصفها.

نتيجة التحري
#متصدقش هتقولك حقيقة كلام سماح أنور، وهل فعلا نقدر نعيش من غير مياه ولا لأ؟
- في البداية نقدر نقول إن المياه مهمة جدًا لصحتنا، وممكن الإنسان يعيش أسابيع من غير أكل، لكن أيام قليلة من غير مياه.
- جسم الإنسان بيتكون من 50-75٪ مياه، وبتشكل أساس الدم وعصارة الجهاز الهضمي والبول والعرق، وهي موجودة في العضلات والدهون والعظام.
- المياه مهمة جدًا لإنها بتحافظ على درجة حرارة جسمنا وبتحميه من الجفاف، وبتمتص الصدمات داخل العين والحبل الشوكي وفي الكيس الأمنيوسي المحيط بالجنين أثناء الحمل، وكمان بتساعد في التخلص من فضلات الجسم عن طريق التبول والتعرق وبتحافظ على صحة وسلامة كل خلية في الجسم، خاصة إنها بتحافظ على مجرى الدم سائلًا للتدفق عبر الأوعية الدموية.
- كمان المياه بتقلل مخاطر الإصابة بعدوى المسالك البولية، لأنها بتحمي المثانة من البكتيريا، ومهمة لحركة الأمعاء والهضم وعشان كدا بتحمي من الإمساك، ده غير إنها بتحافظ على صحة الجلد وترطيب البشرة.
# سماح أنور قالت إن شرب المياه الكتير غلط وبيسبب أزمات في القلب، يا ترى هل الكلام ده صح؟
- مهم طبعا إننا نشرب مياه، لكن شرب المياه زيادة عن اللزوم هيخلي الجسم يصاب بتسمم الماء Hyponatremia، والحالة دي بتحصل لما الصوديوم يقل في الدم بعد شرب مياه كتير أوي زيادة عن حاجة الجسم في وقت قليل.
- الصوديوم ضروري لتقلص العضلات وهو مسؤول عن إرسال النبضات العصبية، ونقصه بيتسبب في الصداع وعدم وضوح الرؤية وتشنجات وتورم في الدماغ وممكن الإنسان يدخل في غيبوبة وفيه حالات بتوصل للموت.
- نقص الصوديوم بيحصل غالبا لناس عندهم أمراض عقلية معينة زي الفصام، ومع الرياضيين لو استهلكوا مايه كتير أوي وأحيانًا مع الرُضع لو أخدوا لبن مخفف جدًا.
- وبشكل عام لو شربنا كمية كبيرة من المياه في مدة قليلة، ساعتها الكلى مش هتقدر تتخلص من السوايل دي عن الطريق البول، ووقتها هيبقى الدم تركيزه خفيف.
#طيب إيه هي كمية المياه المناسبة اللي ناخدها عشان ميجلناش جفاف ولا يحصلنا تسمم مياه؟
- الأكاديمية الوطنية للطب في أمريكا حددت الكمية الكافية من السوائل اليومية للبالغين بحوالي 13 كوب مياه للرجال و9 للنساء مع (الكوب الواحد في حدود 200 مللي ) يعني من 2-3 لتر في اليوم تقريبا. وطبعًا الرياضيين أو الناس اللي عايشة في بلاد جوها حار جدًا ممكن يحتاجوا مياه أكتر
- طبعًا دا مش قانون يعني عادي لو شربنا أقل من الكمية دي شوية أو أكتر شوية على حسب الاحتياج اليومي لكل شخص لانها بتختلف من يوم للتاني.
- تقريبا يفقد البالغين من 2.5-3 لتر مياه يوميًا، والجسم مش بيخزن المياه فلازم كل يوم نعوضه بمياه بدل اللي فقدها، وبتعتمد الكمية التي بنحتاجها على الوزن، والنظام الغذائي، والطقس سواء حار أو بارد، والطعام اللي بناكله.
- يعني الناس اللي ماشية على نظام غذائي بياكلوا فيه بروتين كتير لازم يشربوا مياه كتير، كمان الناس اللي بتعاني من الامساك لازم ياكلوا ألياف كتير ويشربوا معاها مياه كتير. والناس اللي مستويات نشاطها مرتفع زي الرياضيين بيفقدوا مياه أكتر فبيحتاجوا كميات مياه أكتر. كمان في حالة القيء والإسهال لازم المريض يعوض السوايل اللي جسمه خسرها فلازم يشرب مياه كتير.
- ممكن نعرف احتياجنا دا بمراقبة لون البول لو غامق أوي وكميته قليلة كدا معناه في نقص سوائل في الجسم، ولو لونه فاتح زيادة عن اللزوم والكمية كثيرة جدا دا معناه ان الجسم مليان سوائل ودا طبعا في حالة إن الشخص مش بياخد أدوية معينة لأنها أحيانا بتأثر على لون البول.
# سماح أنور قالت إنها تستبدل المياه بسوائل تانية.. هل فعلًا ده بيعوّض عدم شرب المياه؟
- احنا ممكن ناخد احتياجنا اليومي من المياه عن طريق أكل خضار وفاكهة فيهم نسبة مياه زي البطيخ مثلًا، لكن كل الأطعمة دي ممكن تدينا 20% من احتياجنا بس، وخلال عملية الهضم ممكن الجسم ينتج 10% من المياه اللي محتاجها.
- الكلام ده معناه إن فيه 70% لازم ناخدهم من السوايل. فيه ناس بتعتمد أكثر على المشروبات زي الشاي والعصاير والمشروبات الغازية، لكن الأزمة إن المشروبات دي في كثير من الأحيان بيبقى فيها سعرات حرارية عالية خصوصًا المشروبات اللي متحلية بالسكر، وده معناه إنها هتتسبب زيادة للوزن وأمراض القلب والسكر والسمنة وتسوس الأسنان.
- الحل دايمًا في شرب المياه العادية اللي بتساعد الناس على اتباع نظام غذائي صحي لأن المياه صفر سعرات حرارية فمش هينتج عنها سمنة ولا أمراض في القلب. لكن لو مضطرين أوي ممكن ناخد السوايل اللي محتاجينها من المشروبات الساخنة لكن نتجنب إضافة السكر، وطبعًا وقتها ممكن ندخل في أزمة الإفراط في الكافيين لو كان اعتمادنا بالكامل على الشاي والقهوة.
#إيه اللي هيحصل لو نسبة السوائل في جسمنا قلت؟
- الجسم هيدخل في حالة جفاف وهتظهر عليه أعراض زي العطش والصداع والخمول وضعف وتعب عام وتغيرات المزاج والاستجابات البطيئة والارتباك والهلوسة. ده غير انه هيحصل جفاف في الأنف والشفاه، وممكن الموضوع يتطور ويتوقف البول ويحصل فشل في الكلى ووقتها الجسم مش هيقدر يتخلص من النفايات السامة. وفي الحالات القصوى، يمكن أن يؤدي الجفاف إلى الوفاة.

المصادر

مراجع التحقق مصادر الادعاء

Tags

سماح أنور الأكاديمية الوطنية للطب

آخر التحقيقات

الإفراج عن 9 مقابل "التهدئة" بعد تجدد الاشتباكات في جزيرة الوراق.. متصدقش تكشف تفاصيل مفاوضات الأمن الوطني و"كبار عائلات"

Nov. 20, 2024 - اجتماعي

240 % زيادة في عامين ونصف.. كيف ساهمت قرارات الحكومة في ارتفاع أسعار الخضروات؟

Nov. 20, 2024 - اقتصاد

متهمون بـ"تخريب اقتصاد السودان" | متصدقش تكشف تفاصيل احتجاز 15 سائقًا مصريًا بـ"دنقلا" السائقون "اعتقلوا" أثناء عودتهم بشحنات سمسم.. "النيابة" تتحفظ على جوازت سفرهم وسياراتهم

Nov. 18, 2024 - سياسي

"تحريات الأمن" أثبتت عدم وجود انتماءات سياسية | "نيابة المنصورة" تتهم 5 من أهالى المطرية بـ"التحريض على التجمهر".. حبس 5 وإيداع طفل المؤسسة العقابية وإخلاء سبيل 23 بضمان مالي

Nov. 18, 2024 - اجتماعي

بعد فض احتجاجهم بالغاز المُسيل للدموع.. إصابة عدد من أهالي المطرية بالدقهلية والقبض على 25 طالبوا بإنارة طريق " المطرية - بورسعيد" ومنع "النقل الثقيل" بعد وفاة 13 في حادث

Nov. 17, 2024 - اعرف

هاجمتهم من قبل في منشورات مختلفة.. ادعاءات انتماء الطبيبة وسام شعيب لـ"الإخوان" كاذبة

Nov. 13, 2024 - اجتماعي

28 مليار دولار خلال 3 سنوات | رأس الحكمة وحصص في فنادق وشركات بترول وأسمدة خريطة استثمارات "أبو ظبي القابضة" في مصر

Nov. 11, 2024 - اقتصاد

عن الرقعة الزراعية وفيروس سي و25 يناير.. 3 تصريحات غير دقيقة ومضللة لمصطفى بكري

Nov. 10, 2024 - سياسي