حقيقة تعيين أحمد الفضالي سفيرا للأمم المتحدة

– الكلام ده مفبرك، مش حقيقي، ومفيش منصب اسم سفير الأمم المتحدة لمحاربة الجوع.✅✅

– للأسف مواقع صحفية مفترض إنها كبيرة نشرت الكلام دون التأكد منه. وباستثناء المصري اليوم اللي قالت إن مصدر الخبر هو “تيار الاستقلال” بتاع الفضالي، مفيش أي موقع تاني قال مصدر الخبر. المصري اليوم
Albawaba El Dostor جريدة الدستور بوابة روزاليوسف-الصفحة الرسميةا صدى البلد – Sada Elbalad
– سفراء النوايا الحسنة بيتم تعينهم عن طريق برامح ووكالات وصناديق الأمم المتحدة، يعني مثلًا منظمة الأمم المتحدة للطفولة “اليونيسف”، قررت اختيار ليونيل ميسي سفيرًا للنوايا الحسنة في 2010. يعني مفيش حاجة اسمها الأمم المتحدة بتقرر، اللي بيقرر اختيار السفراء هي البرامج والصناديق والمنظمات التابعة للأمم المتحدة.✅✅

– كمان أي اختيار سفير نوايا في الأمم المتحدة بيتم الاعلان عنه على موقع المنظمة اللي اختارته، ومش الشخص اللي بيقول انهم اختاروني، وهيعملوا لي حفلة تنصيب في الأمم المتحدة 🙂

– بحسب الخبر، الفضالي هيشارك “في مواجهة الجوع وسوء التغذية في العالم”، والبرنامج الوحيد المتخصص في محاربة الجوع هو برنامج الأغذية العالمي (wfp)، والبرنامج لم يعلن عن تعيين الفضالي، وأخر إعلان عن تعيين سفير للنوايا الحسنة في البرنامج ده كان يوم 11 يوليو الماضي، لما اختاروا المغنية الإيطالية لورا بوسيني سفير للبرنامج. World Food Programme Middle East World Food Programme – WFP

– كمان سفراء النوايا الحسنة لمحاربة الجوع موجود أسمائهم وصورهم على الموقع بتاع برنامج الغذاء العالمي ومن أبرزهم رونالدينو وكاكا وعدد من الفنانين والمشاهير من بينهم 2 عرب هما الفنان محمود ياسين والفنانة هند صبري.

-في كمان سفراء نوايا حسنة تابعين لمنظمة الأغذية والزراعة “FAO”، ودول كمان مفيش من ضمنهم أحمد الفضالي، ومتمش اختيار سفراء جدد للمنظمة.

** لما دورنا بالانجليزي لقينا الشيء الوحيد المذكور هوا ان أحمد الفضالي تم تعيينه مدير اقليمي لجهة اسمها “المؤسسة الحكومية الدولية لاستخدام الطحالب الدقيقة (سبيرولينا) ضد سوء التغذية”، لكن المواقع اللي نشرت الخبر ده مواقع صغيرة غير موثوقة، من اللي بتسمح بالنشر عبر طرف تالت، أحدها ناشر بيانات الجهة اللي بعتت الخبر ، وهوا اسم شخص مش من الامم المتحدة ولا حاجة ده واحد اسمه سمير النيل من شركة اسمها Plan 4 Trainingملهاش موقع على الانترنت، والخبر اتبعت من دبي، ومكتوب رقم موبايل اماراتي للتواصل، ولنك التواصل عبر الايميل بيحيل على موقع متخصص في نشر البيانات الصحفية اسمه Free Press Release.
** لما فتحنا موقع مؤسسة استخدام الطحالب لمكافحة سوء التغذية دي، لقينا مذكور فيه ان لها تعاون مع الأمم المتحدة لكن طبعاً ليست أحد منظماتها الرسمية، لكن برضه ملقيناش أي ذكر لان الفضالي اتعين عندهم مدير اقليمي! بينما مذكورة أسماء اماراتية زي الشيخة روضة بن زايد آل نهيان سفيرة النوايا الحسنة للمنظمة دي.

– سبق وقبل كده المركز الإعلامي للأمم المتحدة في مصر سنة 2014، حذر من “النصب باسمها وجمع تبرعات” بإعلان منح الأمم المتحدة لقب “سفراء النوايا الحسنة للأمم المتحدة”، أو “منح جوازات سفر وامتيازات الأمم المتحدة” لشخصيات ومشاهير في مصر ومنطقة شمال إفريقيا والشرق الأوسط.

– وقتها قالوا إن اختيار سفراء النوايا الحسنة للأمم المتحدة يتم وفقا لمعايير صارمة جدًا. وعندما تقرر الأمم المتحدة تعيين سفير للنوايا الحسنة، فإنها تعلن ذلك دائما من خلال قنوات الاتصال الرسمية للأمم المتحدة (البيانات الصحفية الرسمية والمواقع الإلكترونية للأمم المتحدة، والمتحدثون باسم الأمم المتحدة). ولا يخول لأي فرد أو أي منظمة أخرى التحدث باسم الأمم المتحدة.