حقيقة إلغاء بوتين ديون كرواتيا بعد زيارة رئيستها

– الكلام ده كله غير صحيح، ومفيش أي وسائل إعلام اتكلمت عن القصة دي. وكمان الصورة كانت من لقاء جمع بوتين وكوليندا قبل نهائي كأس العالم في 15 يوليو الماضي، وخلاله أعطى بوتين باقة ورد لكوليندا اللى في المقابل أعطته تيشيرت منتخب كرواتيا.✅✅

– حسب موقع الرئاسة الروسية (الكرملين) أغلب الكلام خلال اللقاء كان عن الكورة، وقمة حلف الناتو، ولقاء بوتين مع ترامب.

– بوتين وكوليندا متقابلوش تاني من وقت كأس العالم الماضي، ومتمش بينهم أي مكالمة هاتفية حتى. بحسب موقع الكرملين.

– لحد سنة 2011 روسيا كانت بتدفع ديون عليها لكرواتيا من الحقبة السوفيتية، وآخر دفعة من الديون دي ادفعت في 2011 في شكل منتجات تكنولوجية ومعدات لمحطات الطاقة. في سنة 2017 بنك روسيا سبيربنك الحكومي كان مداين مجموعة أغراكور الغذائية ومبيعات التجزئة الكرواتية بمبلغ 1.1 مليار يورو، وحصل أزمة وقتها بسبب تعثر المجموعة وعجزها عن السداد فتدخلت الحكومة، وتم الاتفاق في يونيو 2018 على حصول البنك الروسي على 40% من مجموعة أغراكور الكرواتية.

وعموما الدين الخارجي لكروتيا حتى يوليو الماضي كان 46 مليار دولار.

– دي مش أول مرة الإشاعة دي تنتشر، سبق واتنشرت قبل كده في يوليو اللي فات وصححناها في وقتها.