واتس آب الذهبي

– أحد المتابعين بعت يسألنا عن حقيقة تطبيق منتشر اسمه “الواتس الذهبي” أو “WHATSAPP GOLD”، ولما دورنا ورا الموضوع لقينا إن في كلام كتير حواليه، وبسبب خطورة التطبيق ده والتطبيقات المشابهة قررنا نكتب البوست بشكل عام عشان كلنا تستفيد.⬇️⬇️

**إيه هو الواتس الذهبي ده؟
– “الواتس الذهبي” أو “WHATSAPP GOLD” ده عبارة عن تطبيق بدأ ينتشر في 2016، وبيدعي إنه إصدار مميز من شركة “واتسآب” الشهيرة، وإنه بيوفر لمستخدميه العديد من الميزات الإضافية زي القدرة على إرسال مئات الصور في وقت واحد، ورموز تعبيرية جديدة، ومكالمات الفيديو، وميزات أمان إضافية وغيره.

– عادة الموضوع بيبدأ برسالة بتجيلك على تطبيق الواتس الطبيعي بتاعك، وبتنصحك بالتطبيق الجديد مع لينك لتحميله. أو ممكن حد من أصحابك أو معارفك اللي بيستخدموه ينصحك به.

**هل التطبيق ده من شركة “واتسآب” المعروفة فعلًا؟

-لأ التطبيق ده ملوش أي علاقة بشركة “واتسآب” والشركة نفت أي علاقة لها به أو بتطبيق آخر مشابه منتشر بردو اسمه “WhatsApp Plus”، وقالت إن تطبيق “واتسآب” العادي هو تطبيقها الوحيد.

**هل التطبيق ده خطر أو في منه مشاكل؟
– أيوه التطبيق ده خطر جدًا جدًا، وبيصيب الموبيل بتاعك بفيروسات ضارة بمجرد تحميله، وبيسمح لمجرمي الإنترنت بسرقة بياناتك من صور ومكالمات ومعلومات على الموبيل، أو تتبع تحركاتك المختلفة ونشاطك.

– التطبيق ده جهة مجهولة اللي عملاه وممكن بسهولة جدًا تبتزك بالبيانات اللي سرقتها من موبيلك.

**طيب أعمل إيه لو اتبعتت لي الرسالة بتاعت “الواتس الذهبي”؟
– تجاهل الرسالة واحذفها فورًا من عندك. وإياك والضغط على اللينك اللي هيكون موجود في الرسالة. ويا ريت كمان تبلغ اللي بعتهالك إن ده فيروس ويبطل ينقل الرسالة.

**طيب لو أنا بالفعل عندي التطبيق، أعمل إيه؟
-لازم تلغي تثبيت التطبيق من عندك بشكل فوري. والأفضل بعدها تعرض موبايلك على حد متخصص يفحصه.