حقيقة تصريحات مدرب تشيلسي عن إسرائيل

بوستات منتشرة بشكل كبير جدًا بتقول إن موريزيو ساري، مدرب فريق تشيلسي الإنجليزي قال “‏ساري حول رفضه الذهاب لإسرائيل مع تشيلسي|”انا لست بشخص عنصري ، أنا ضد أي مجتمع يسلب حقوق الآخرين ، عدم سفري للمباراة الودية ضد فريق يهودي لأني أكره بشدة الأشخاص الذين يسلبون حقوق الآخرين”.

الكلام ده غير صحيح ودي تصريحات مفبركة على لسان ساري.

كمان نادي تشيلسي ملعبش أي مباراة خلال فترة تدريب ساري له في إسرائيل، وبالتالي مفيش موضوع الراجل يعلق عليه بالكلام ده.
اللي حصل إن تشيلسي لعب يوم الأربعاء اللي فات مباراة ودية خيرية مع فريق نيو إنجلاند في أمريكا، من أجل جمع تبرعات لصالح محاربة “معاداة السامية”، والماتش ده اتلعب بدعم من مالك نادي تشيلسي الروسي رومان أبراموفيتش (يحمل الجنسية الإسرائيلية)، وعلى غير رغبة ساري اللي انتقد توقيت المباراة وقال إن رغم تقديره لهدفها الإنساني لكن فريقه محتاج للراحة استعدادًا لمواجهة أرسنال في نهائي الدوري الأوروبي.

كمان ساري انتقد من فترة هتافات بعض جماهير تشيلسي اللي وصفت بأنها “معادية للسامية” بعد ما بعض الجماهير رددت أغاني تناهض الديانة اليهودية، قبل ماتش لهم مع توتنهام المعروف بارتباطه بالمجتمع اليهودي، ووقتها ساري وصف الأمر بإنه “عار” وأدان كل أشكال العنصرية، وقال إنه يجب توحيد الصفوف ضدها.

خلال زيارة فريق تشيلسي لبوسطن من أجل المباراة، تغيب ساري عن رحلة الفريق إلى النصب التذكاري للهولوكوست في بوسطن واتقال إنه كان مريض واضطر يقعد في الفندق بأوامر من الطبيب، ويقال إن مالك النادي قفش من ساري بسبب الموقف ده.

في كلام كتير عن إن ساري هيسيب تشيلسي بعد مباراة الأرسنال، وهيرجع يدرب في إيطاليا تاني، بسبب علاقته اللي مش كويسة مع مالك النادي رومان أبراموفيتش، وكمان بسبب علاقته السيئة مع الصحافة وجماهير تشيلسي اللي مش حابه أسلوبه وسبق وهتفوا ضده في المدرجات.