حقيقة وفاة الإعلامي السعودي أحمد الشقيري

– الكلام ده غير صحيح. مفيش أي مصدر موثوق للخبر، وموقع “سبق” اللي نشر الخبر ده مش هو الموقع السعودي المعروف، ده موقع مفبرك وبينشر أخبار مفبركة بشكل دائم.✅✅

– عنوان موقع سبق الأصلي هو “https://sabq.org” أما الموقع المفبرك عنوانه “http://www.sspq.info”.

– كمان الأستاذ عبد الله البرقاوي اللي اسمه محطوط ككاتب للخبر المفبرك، نفى في حسابه على “تويتر” إنه كاتب الخبر أو له علاقة بالموقع كله أصلًا، وقال إن الموقع ده بيستخدم اسمه وصورته وشعار موقع سبق لترويج أخبار مزيفة. وكمان عمل ريتويت لتغريدة بتقول إن الخبر مجرد شائعة.

– الخبر المفبرك منشور في الموقع يوم 6 سبتمبر الساعة 1:13 دقيقة صباحًا، في حين إن الإعلامي أحمد الشقيري نشر فيديو في حسابه الموثق على “إنستجرام” في نفس اليوم الساعة 5:03 مساءً، يعني بعد نشر الخبر بحوالي 16 ساعة.

– دي مش أول مرة الإشاعة دي تظهر، سبق وانتشرت قبل كده مرتين، مرة في أغسطس 2017، ووقتها مستشفى “الأطباء المتحدون” اللي اتقال إن الشقيري اتوفى فيها نفت الخبر وقالت إنه شائعة. والمرة التانية كانت في أبريل اللي فات من نفس الموقع اللي بينتحل صفة موقع “سبق” وبعدها ظهر الشقيري بشكل طبيعي وبصحة جيدة.