حقيقة نجاة السيسي من تحطم الطائرة المصرية عام 1999

– الكلام ده غير صحيح. فيه 4 أشخاص فقط لم يصعدوا على رحلة مصر للطيران 990 اللي سقطت في أمريكا سنة 1999، ومش من بينهم الرئيس عبد الفتاح السيسي.✅✅

– بحسب ما نشرته جريدة الجارديان في 2 نوفمبر 1999، الأشخاص الأربعة اللي تخلفوا عن الطائرة هم: مستشار في شركة طيران وده ركب مع الطيارة من لوس أنجلوس ونزل في نيويورك، ورجل أعمال مصري اسمه أباظة السيد (55 عام) وده غير رأيه قبل الرحلة بيومين لقضاء وقت مع ابنته وعائلتها، وشيخ مصري اسمه محمد عبد المقصود وده أجل عودته للقاهرة للمشاركة في ندوة في نيو جيرسي (الندوة اتلغت)، وفي سيدة كمان عندها 80 سنة رجعت بيتها قبل الرحلة بيومين.

– بحسب المعلن، كان في 33 ضابط مصري راكبين في الطائرة وكلهم ماتوا. 28 منهم كانوا هناك بشكل رسمي، 15 لحضور تدريبات على أنظمة اتصالات و6 كانوا بيحضروا مؤتمر عن عقود الدفاع لإصلاح صواريخ شبارال، و7 كانوا بيختبروا طائرتين هليكوبتر. وكان في 5 ضباط قالت وزارة الدفاع الأمريكية إنهم مكانوش في الولايات المتحدة لعمل رسمي، وإنها “تعتقد أنهم كانوا هنا في عمل شخصي”.

– الرئيس السيسي تلقى تدريبات في الولايات المتحدة مرتين، مرة عام 1981 وتلقى فيها دورة أساسية في سلاح المشاة في قاعدة “فورت بنينج” في جورجيا، ومرة في سنة 2006 لما كان بيدرس في كلية الحرب الأمريكية في بنسلفانيا، بحسب وكالة رويترز للأنباء.

– دي مش أول مرة تنتشر فيها الإشاعة دي، دي بيتم تداولها من وقت للتاني من سنة 2013.