بعد حصولهم على كأس العالم.. هل مكافآت منتخب ناشئ اليد 1500 جنيه فقط؟

## بعد حصولهم على كأس العالم.. هل مكافآت منتخب ناشئ اليد 1500 جنيه فقط؟

– بعد تتويج منتخب مصر للناشئين لكرة اليد بطلًا للعالم، انتشرت أخبار كتير جدًا عن إن مكافأة كل لاعب في المنتخب هتكون 1500 جنيه، وده أثار استياء وغضب ناس كتير. فهل اللاعيبة هتحصل على 1500 جنيه بس؟!

– مبلغ 1500 جنيه ده اتقال من هشام نصر، رئيس الاتحاد المصري لكرة اليد، خلال مداخلة هاتفية مع الإعلامي عمرو أديب في برنامج “الحكاية”. أديب سأل نصر إن في كلام متداول على السوشيل ميديا إن مكافأة الأبطال هتكون 1500 جنيه، ورئيس الاتحاد قال “للأسف هي دي إمكانيات الاتحاد. هو تبع الوزارة في مكافأة أكبر من كده لإن في لايحة موجودة، لكن كاتحاد إحنا معندناش إننا ندي الأولاد مكافأت كبير. هو أصلًا مفيش لايحة إن أن أديهم مكافآت، إحنا بناخد قرار مجلس إدارة بالإمكانيات المتاحة عشان نصرف لهم الفلوس دي”.

– هنا في نقطة مهمة في كلام هشام نصر الناس مأخدتش بالها منها، وهي إن مكافأة الاتحاد المصري لكرة اليد دي حاجة لوحدها، لكن في مكافأة تانية من وزارة الشباب والرياضة.

– النقط دي رجع هشام نصر أكد عليها في تصريحات تانية لقناة “صدى البلد”، وقال إن “الموضوع فهم غلط عن لسانه”.

ووضح نصر إن وزارة الشباب والرياضة هي اللي بتحدد المكافآت، وإن منتخب الشباب اللي حصل على ثالث العالم أول الشهر الحالي الوزارة صرفت مكافأة لكل لاعب 59 ألف جنيه، ومتوقع تكون مكآفاة الفوز بالبطولة لمنتخب الناشئين تتراوح من 110 لـ120 ألف جنيه.

– المبلغ الحقيقي اتأكد من وزير الشباب والرياضة أشرف صبحي اللي قال في تصريحات لموقع “البوابة نيوز” إن “مكافأة كل لاعب من أبطال منتخب مصر لكرة اليد أبطال العالم 112.500 جنيه”. وإن الكلام عن إن المكافأة 1500 جنيه بس غير صحيح، وتم الإعلان عنه من رئيس اتحاد كرة اليد بالخطأ وتم تصحيحه.

– كمان رئيس الاتحاد المصري لكرة اليد قال إن اتحاد كورة اليد معندوش لائحة مكافآت للبطولات لأن معندوش فلوس، لكن بيصرف مكآفات رمزية للاعبين بشكل فوري، ووصلت إجمالي المبلغ حوالي 1500 دولار لكل لاعب، وإن اللفظ طلع منه جنيه بالغلط، بس هو فعلًا 1500 دولار.