حقيقة العثور على آثار مصرية على سطح المريخ

الكلام ده غير صحيح، دي تكوينات جبلية في كوكب المريخ مش آثار.✅✅

– أغلب البوستات والتقارير اللي ناشره عن الموضوع ده نقلته بشكل غير دقيق وفيه مغالطات،الموضوع أصله إن في واحد اسمه سكوت سي وارنج بيوصف بإنه “صياد الأجسام الغريبة”، نشر فيديو بيقول فيه إنه خلال بحثه في الصور اللي نشرتها وكالة ناسا لكوكب المريخ، لقى صورة بيظهر فيها تابوت وتماثيل فرعونية منحوتة في جبل، وبيستدل بده على إن الفراعنة أصلًا كائنات من خارج كوكب الأرض ونزلوا مصر وبنوا حضارتهم فيها.✅✅

الصورة للي يبص فيها بوضعها الطبيعي مش هيلاحظ فيها حاجة غريبة، لكن وارنج قام بتكبيرها عدة مرات وتلوين بعض المناطق فيها عشان يقول إن دي تماثيل فرعونية.

– الصورة اللي وارنج نشرها وقال إن فيها تماثيل فرعونية، منشورة على موقع وكالة ناسا الرسمي من سنة 2007، ومكتوب إنها لتفاصيل تكوينات جبلية في منحدر مسمى كيب سانت فنسنت شمال منطقة حفرة فيكتوريا بكوكب المريخ.

– مفيش أي دليل علمي أو مكان موثوق نشر تأكيد للكلام اللي بيقوله وارنج ده، وبعض المتخصصين بيعتقدوا إن رؤية تماثيل في التكوينات الصخرية اللي في الصورة دي مجرد شيء من وحي الخيال، وإن الشخص اللي بيقول بالاكتشاف ده ممكن يكون بيعاني من “باريدوليا”، وهي ظاهرة نفسية حيث يرى الناس أشكالًا معروفة في السحب أو التكوينات الصخرية.

– سكوت سي وارنج بيدعي إن اكتشافه ده جديد وهيهز علم الآثار، لكن في الحقيقة في الكلام على إن في تمثال فرعوني في الصورة دي بيتم تداوله من عام 2008.

– عدد من المواقع المصرية، زي “الوطن” و”صدى البلد” وصفوا سكوت سي وارنج بإنه “خبير من وكالة الفضاء الأمريكية ناسا”، وده طبعًا كلام غير صحيح، وهو مجرد شخص بيقول إنه بيبحث عن الأجسام الغريبة اللي بتظهر في الصور.

– عدد من المواقع المصرية زي “الدستور” و”فيتو” نشروا عناوين أخبار بعنوان “ناسا تعثر على صور لتابوت فرعوني على الكوكب الأحمر” و”العثور على آثار فرعونية على سطح المريخ”، ودي طبعًا عناوين مضللة.