حقيقة انخفاض منسوب مياه النيل

– الفيديو قديم. وأقدم نسخة موجودة منه من ديسمبر 2011. كمان لو ركزنا شوية هنلاقي ظاهر بالفيديو مبنى الحزب الوطني المحروق واللي بدأ يتهد في مايو 2015.✅✅

– انخفاض منسوب النيل بيكون أمر متعمد من وزارة الري، اللي بتقفل بوابات تصريف السد العالي المتحكمة في نسبة المياه في النهر، استعدادًا لموسم السيول اللي ممكن يؤدي لغرق قرى كاملة لو منسوب النيل كان عالي. وكمان بيتم تقليل نسب المياه المضخوخة في النهر بين المواسم الزراعية لعدم إهدارها.

– الجدل والكلام حول انخفاض منسوب مياه النيل بيتجدد بشكل سنوي تقريبًا. على سبيل المثال المنسوب كان منخفض في شهر فبراير اللي فات وحصل جدل بردو، والوزير طلع وضح.

– طبعا ده لا ينفي تأثير سد النهضة على نهر النيل.

– مفاوضات ملء سد النهضة الإثيوبي ما زالت شغالة ولم تصل إلى جديد. إثيوبيا عاوزة تخزن 74 مليار متر مكعب من مياه النيل في بحيرة السد على مدار ثلاث سنوات، لكن مصر عايزه فترة أطول (7 سنوات) بحيث لا تؤثر على كمية المياه اللي بتوصلنا من النيل. خصوصًا وإن في دراسات بتقول إن لو السد اتملى في خلال 3 سنين بس فحصة مصر والسودان من المياه هتنقص حوالي 24 مليار متر مكعب سنويًا لمدة 3 سنين، ودي كارثة كبيرة.