حقيقة منح مليون تأشيرة لكرواتيا حال فوزها بكأس العالم

– الكلام ده غير صحيح، ومفيش أي مصادر له، يضاف لسلسلة الأكاذيب المنتشرة حول كرواتيا بعد انتصاراتهم المتتالية في كأس العالم.✅✅

– آخر تصريحات رئيس كرواتيا عن الماتش كان بفيديو على صفحتها على فيسبوك وقالت فيه: “بالنيابة عن المشجعين الكروات، أشكر روسيا على كرم الضيافة. كنتم مضيفين رائعين. ادعمونا الليلة. دعونا نحتفل معًا. شكرًا لك يا روسيا! نحن قادمون!”.

– رئيسة كرواتيا متقدرش تاخد قرار زي ده لإن كرواتيا دولة برلمانية، وبالتالي السلطات الأكبر فيها بإيد رئيس الوزراء مش رئيس الجمهورية. ومنصب رئيس الجمهورية في كرواتيا هو منصب شبه شرفي وسلطته بشكل أساسي على الجيش وبعض الشؤون الخارجية.

– كرواتيا دولة عضو في الاتحاد الأوروبي من سنة 2013، والاتحاد الأوروبي عنده سياسة موحدة للتأشيرات محدش بيخالفها، لكن كرواتيا ليست من دول الشنغن، وليها نظامها الخاص في الحصول على التأشيرة.

– قرار زي اللي بيتم الكلام عنه ده غير منطقي، لأنه كفيل بإغراق أوروبا باللاجئين لأن كرواتيا بوابة العبور الأشهر إلي أوربا من ناحية البلقان، في حين هي عندها أزمة أصلًا معاهم، ومن 2015 دول الاتحاد الأوروبي بتحاول توصل لاتفاق بخصوص كيفية التعامل مع اللاجئين ومنجحتش في ده غير من أسبوعين بس.

– كرواتيا كانت طرف في أزمة اللاجئين في أوروبا 2015، بعد رفضها استقبال أكتر من 17 ألف لاجئ، بدعوى إن دي حدود استيعابها. فهل منطقي تسمح بدخول مليون واحد لها ممكن يتحول جزء كبير منهم للاجئين؟!