القصة العجيبة لاكاونت تويتر المزيف باسم كابتن رضا عبدالعال

– خلال الأيام اللي فاتت ناس كتير شيرت تويتات من حساب على تويتر بيحمل اسم الكابتن رضا عبد العال، لاعب نادي الزمالك والأهلي السابق، بالتزامن مع الجدل اللى دار عن توقعات عبدالعال لمنتخب مصر إنه يكون “حصالة المونديال”.✅✅

-رغم إن الكابتن رضا نفسه نفى وجود حساب له على تويتر، دورنا أكتر ورا قصة الحساب المزيف، خاصة إنه في وقت قياسي بقى بيتابعه قرابة 100 ألف شخص، وكمان بيتابعه صحفيين ومشاهير باعتباره حساب حقيقي، ومواقع إخبارية بتاخد اللى بتكتب من الحساب وتنشره كأنه تصريحات حقيقية❌❌.

– مفاجآت وصلنا لها في الحساب المزيف اللى الهاندل بتاعه ده (reda_abd_el3al@)، الحساب كتب أكتر من 15 ألف تويتة، لما راجعنا القديم منها كانت مفاجأة لينا.

– الحساب ظهر لأول مرة على تويتر وقت الثورة في 2011، وكان الهاندل بتاعه (@MustafaBakri643)، واستمر كده لحد 2015. كان الكاتب مصطفى بكري وقتها واحد من الشخصيات المثيرة وقتها والتعليقات كتير عنه زي الأيام دي مع رضا عبدالعال.

– وفي 2016 اتغير هاندل الحساب على اسم الكاتب والأديب يوسف زيدان (@Yousif_zydan).. وتفاعلاته في الوقت ده كانت أكتر مع حسابات بتعرف نفسها من العراق، بعض الحسابات دي لما دورنا وراها برضو لاقينا إنها بتغيَر الهاندل بتاعها من وقت للتاني.

– التغريدات القديمة للحساب كانت بتتضمن أحيانا أشعار أو خواطر، وتويتات عن الأحداث اللى بتحصل في الشارع، وده كان غريب شوية لأننا لما دورنا أكتر عن الهاندل الأصلي للحساب (@MustafaBakri643) لاقينا حساب بنفس الهاندل واسمه التعريفي “عمر الخيام” على موقع الأسئلة (Ask.fm).

– حسابه على Ask.fm توقف عن الرد على أسئلة الناس من 6 شهور، وهي نفس الفترة تقريبا اللى اتغير فيها هاندل حساب تويتر إلى اسم الكابتن رضا عبدالعال، لأنه أصبح مصدر للجدل والسخرية كل أما يطلع في برنامج ع التليفزيون.

– فكرنا نكمل كمان شوية، فقلنا ناخد نفس الهاندل القديم للحساب (@MustafaBakri643) ونرميه في سيرش فيس بوك، فلاقينا في النتايج حساب شخصي اسمه “هاني شاكر” على فيس بوك، كان عامل بوست في 2013 حاطط فيه رابط الحساب بتاع Ask.fm.

– لما فتحنا حساب فيس بوك لاقيناه عبارة عن بوستات مدح في حسني مبارك، وآخر بوست كتبه كان 9 يونيو 2013. لما دققنا في الصفحات اللى عامل لها لايك لصفحات مؤيدة لمبارك وصفحات إخبارية.

– لاحظنا إن صاحب حساب فيس بوك كان كاتب رقم تليفون تقريبا بدل اسمه في رابط حسابه، قلنا نجرب فلاقينا إنه رقم موبايل حقيقي صاحبه اسمه “هاني” على تطبيق تروكولر.