حرب الهاشتاجات بين #أرحل_يا_سيسي vs #السيسي مش هيرحل

– الكلام عن مدى شعبية أي هاشتاج بيشغل ناس كتير في مصر، مؤخرًا فيه هاشتاجين، الأول بيطالب برحيل الرئيس عبدالفتاح
السيسي والتاني بيقول إنه مش هيرحل.

– والكلام في ده دايمًا عامل زي حقل ألغام، ربما لأنه الموضوع سياسي.. احنا هنا مش بنحكي سياسة، لكن بنعلق ببساطة بشكل
معلوماتي من واقع إن معركة ذات الهاشتاجين كانوا لافتين للنظر خلال الأيام الأخيرة.

-دي معلومات بسيطة عن الهاشتاجين:

1 – هاشتاج #ارحل_يا_سيسي
حسب إحصاءات تويتر عدد التغريدات على الهاشتاج ده تقترب من 300 ألف. ولما كان في ذروته كان معدل التغريد عليه 3200 تغريدة في الساعة.. وحاليا 1412 تغريدة.
أول تغريدة على الهاشتاج ده كانت الساعة 9:07 من مساء 2 يوليو 2013. والهاشتاج بيتكتب عليه من وقت للتاني، لكنه ظهر بشكل لافت ما بين يوم 22 لـ 25 يونيو، ومازال في قائمة الترند على مستوى مصر.

* كان فيه هاشتاج تاني اسمه #ارحل_ياسيسي بس مكانش منتشر بشكل كثيف رغم إنه قديم وأول ظهور له كان يوم 4 يوليو 2013. وحاليا معدل التغريد عليه 121 تغريدة في الساعة.
معظم التغريدات عليه خرجت من مصر، وبعدها بنسبة أقل الإمارات والولايات المتحدة وإنجلترا والنرويج.

2- #السيسي_مش_هيرحل
آخر إحصاء له على تويتر كان نحو 60 ألف تغريدة.. أول تغريدة عليه كانت في 23 يونيو الجاري الساعة 2:50 بعد الظهر.. ربما كرد فعل على ظهور الهاشتاج الأول ع التايم لاين.
في وقت ذروته كان معدل التغريد عليه 300 تغريدة كل ساعة، وحاليا 8 كل ساعة.. ولمرة واحدة بس الهاشتاج عمل ترتيب متقدم لوقت قصير قائمة ترند تويتر على مستوى مصر، لكن مفضلش كتير قدام هاشتاج #ارحل_يا_سيسي.
والغريب إنه لأول مرة صحف وقنوات إخبارية مصرية تحط الهاشتاج ده مع أي خبر بيتم نشره في حساباتها الرسمية على تويتر، حتى لو مالوش صلة بموضوعه، وبعضها زي صحيفة الجمهورية خرجت تاني يوم قالت إن بيتصدر تويتر رغم إنها في نفس الخبر ناشرة سكرين شوت موضح إن ترتيبه الرابع مش الأول.

معظم التغريدات عليه خرجت من مصر، وبعدها بنسبة أقل الإمارات والولايات المتحدة والبرازيل وهولندا.

* كان فيه هاشتاج تاني مماثل اسمه #السيسى_زعيمي_وافتخر وده ظهر أول مرة حوالي الساعة 3 و10 دقايق من صباح يوم 21 يونيو الجاري.. معدل التغريد عليه حاليا 12 تغريدة في الساعة.

* بالنسبة لعدد المشاركين في الهاشتاجين، فيه مشكلة بيقع ناس كتير، لما بيستخدموا أدوات معينة ويقولوا مثلا الهاشتاج كتب عليه ملايين من الناس، وبينشروا انفوجرافيك خاصة بتحليل الهاشتاج للتدليل على ده، لكن الحقيقة إنهم بيخلطوا ده مع حاجات تانية خالص في الماركتينج، اسمها Reach و Impression.. طب ايه ده؟
الأول معناه عدد الزيارات أو التفاعلات الأصيلة مع بوست أو محتوى معين، أما التاني فهو دايمًا بيكون أكبر من الأول، ومقصود بيه عدد مرات ظهور بوست معين ع التايم لاين، ومش يكون تم التفاعل معاه، ومفيش وسيلة تعرفها إذا كان البوست تم استعراضه ومتابعته من آخرين أو لا.

* متكلمناش عن نسب المشاركة بالأرقام من كل دولة بالظبط لأن النسب متغيرة دايمًا، بس الثابت من واقع ملاحظتنا خلال الأيام الأخيرة إن أكبر نسبة مشاركة على الهاشتاجين خرجت من مصر، وبعدها الإمارات، ومكنش فيه تغريدات كتير خارجة من دولة قطر أو تركيا بالمناسبة عشان البعض قال كده.