حقيقة إرسال يوفا وفد لمعاينة استاد القاهرة

– الكلام ده غير صحيح. الاتحاد الأوروبي لكرة القدم “يوفا” لم يعلن أي خبر بالمحتوى ده، ومفيش أي مصدر موثوق نشره. ✅✅

– نهائي دوري أبطال أوروبا 2020 هيتلعب في ملعب “أتاتورك الأوليمبي” في مدينة إسطنبول، ونهائي الدوري الأوروبي 2020 هيتلعب في ملعب “أرينا غدانسك” في بولندا، أما نهائي السوبر الأوروبي 2020 فهيكون على ملعب “ستاديو دا لوز” بمدينة لشبونة بالبرتغال.

– باب التقدم لاستضافة البطولات الأوروبية الكبرى لعام 2021 اتقفل في فبراير الماضي، وهيتم إعلان اسم الملاعب الفائزة بالتنظيم في سبتمبر الجاي. الملاعب المرشحة لاستضافة نهائي دوري أبطال أوروبا 2021 هي: أليانز أرينا في مدينة ميونخ بألمانيا، وسانت بطرسبرغ في روسيا.

– أما الملاعب المرشحة لاستضافة نهائي الدوري الأوروبي 2021 هي: بوريس بايتشادزه دينامو أرينا في جورجيا، ورامون سانشيز بيزخوان في إسبانيا. والملاعب المرشحة لاستضافة السوبر الأوروبي 2021 هي: استاد دينامو في بيلاروسيا، واستاد هلسنكي الأولمبي في فنلندا، والملعب الوطني لكرة القدم في أيرلندا الشمالية، وملعب ميتاليست في أوكرانيا.

– حاليًا بيتم اختيار الملاعب اللي هيتلعب فيها البطولات الأوروبية الكبرى عامي 2022 و2023، ومفيش أي كلام عن السماح لدول خارج أوروبا باستضافة البطولات دي.

– في عام 2016 اقترح رئيس الاتحاد ألكساندر سفيرين إقامة نهائيات البطولات الأوروبية الكبرى خارج أوروبا بما إن جزء كبير من المشجعين مش أوروبيين، وقال إنه بيعتقد إنها فكرة تستحق المناقشة. وفي 2018 اتجدد نفس الكلام تاني، لكن حتى الآن مفيش خطة معلنة لده، وحتى الآن البطولات الأوروبية الكبرى حتى عام 2023 هتتلعب في أوروبا فقط.