حقيقة إصلاح عطل فيسبوك بعد التعليق بـF8″ 5 مرات

– الكلام ده غير صحيح. مفيش حاجة اسمها لما تكتب “F8” المشكلة هتتحل. والصورة اللي ظاهر فيها مؤسس فيسبوك مارك زوكربيرغ وفي خلفيتها مكتوب “F8″، دي صورة من مؤتمر “F8” اللي بينظمه فيسبوك سنويًا للمطورين. ✅✅

– اللي حصل إن مستخدمي منصات “فيسبوك” و”إنستجرام” و”واتس آب”، واجهوا مشاكل في إرسال واستقبال الصور والمقاطع المصورة والملفات الأخرى، وبشكل عام أغلب الصور مكنتش ظاهرة. دي مكنتش مشكلة خاصة بدولة أو دول محددة، دي مشكلة قابلت مستخدمين في مختلف أنحاء العالم.

– شركة فيسبوك أصدرت بيان بعد بداية المشكلة واعترفت بها، وقالت إنها بتعمل على حلها، وبعدها بـ8 ساعات أصدرت بيان تاني أعلنت فيه حل المشكلة.

– وسائل الإعلام نقلت عن فيسبوك إن سبب العطل غلطة حصلت خلال إحدى عمليات الصيانة الدورية، وقالت “خلال إحدى عملياتنا للصيانة الدورية، أحدثنا مشكلة تجعل من الصعب على بعض الناس تحميل أو إرسال الصور والمقاطع المصور”، لكن دلوقتي كل شيء رجع تمام والمفترض إن 100% من المستخدمين ميحسوش بمشكلة.

– زي ما هو واضح المشكلة عالمية ومتعلقة بالشركة نفسها، فلو قعدنا نكتب “F8” لمدة 10 أيام المشكلة مش هتتحل طالما الشركة محلتهاش.

– الصفحات اللي بتكتب بوستات من النوعية دي بيبقى هدفها الأساسي زيادة التفاعل في التعليقات مع الصفحة، وللأسف بتحقق هدفها لإن كتير من المستخدمين مبيبقاش عندهم خلفية عن المشكلة اللي حاصلة وسببها.